Biografija
Jěwa-Marja Čornakec je so lěta 1959 we Worklecach narodźiła a je wotrostła we Wotrowje. Po wopyće Wotrowskeje a Pančičanskeje šule maturowaše lěta 1977 na SRWŠ w Budyšinje. Po studiju (1977 – 1980) na Fachowej šuli za wědomostne bibliotekarstwo w Lipsku dźěłaše štyri lěta jako wědomostna bibliotekarka na Serbskim wučerskim wustawje w Budyšinje. 1984/85 přeńdźe do Instituta za serbski ludospyt w Budyšinje a poda so na to na studij kulturnych wědomosćow/sorabistiki na KMU do Lipska (1985 – 1990). Znowa bě wona lěto wědomostna sobudźěłaćerka w Instituće za serbski ludospyt.
Wot januara 1992 hač do julija 2011 skutkowaše Jěwa-Marja Čornakec jako šefredaktorka Rozhlada w Budyskim LND a wot awgusta 2011 dźěła jako wuwićowa dramaturgowka w Serbskim ludowym ansamblu w Budyšinje.
Załožba za serbski lud spožči jej 15. oktobra 2011 Spěchowanske myto k Mytu Ćišinskeho za wukony na polu serbskeje dźěćaceje literatury a za skutkowanje jako awtorka dźiwadłowych hrow.
